Mpendwa,
Katika kuzingatia misingi ya nchi yangu popote pale nitakapokuwa katika ulimwengu huu; kuheshimu na kuthamini mchango wa mapambano ya mashujaa wetu katika kujikomboa kutoka makucha ya wakoloni,sina budi kusimamia kwa kadri ya uwezo wangu heshima kubwa tuliyonayo.
Kuna mambo kadha wa kadha ambayo nawajibika nayo, ila mojawapo ni kuona taifa langu halihujumiwi na linaheshimiwa kwa kadri ile ile ambayo naweza kuipigania.
Siku chache zilizopita nilizunguka katika Supermarket moja hapa jijini changchun china, ambako nimekua kwa kadri ya mwaka sasa nikifanya masomo ya elimu ya juu. Kwa hakika kuna mazuri mengi ambayo najifunza hapa, na pia yale ambayo waswahili wanasema 'ukishangaa ya musa utayaona ya firauni", kwa yumkini yote ni sehemu ya kujifunza kwangu.
Aidha katika pitapita hiyo sokoni hapo, nikaona bidhaa moja ambayo iliniuma sana, ila nikaona niweke wazi ili nipate kujua ukweli kwa wadau na wazalendo wengine huko nyumbani. Suala lenyewe ni matumizi ya nembo ya taifa ambayo ikiwa imechakachuliwa kidogo ikitumika kama alama (logo) ya mvinyo mmoja hapa china.
Nilinunua mvinyo huo ambao kiukweli una majina haya "DongaDa Wine" " Tonghuadongda wine", "Red Wine" ili nipate kuweka kumbukumbu za digitali kama ushahidi ambao unaonyesha maelezo zaidi ya mvinyo huo ambao unatumia nembo ya taifa langu.
Kwa hakika nilijiuliza maswali mengi sana ila machache ni haya; (i) Je ni kweli nyuma ya nembo hii kuna kampuni lolote la Tanzania ambalo linaebndesha biashara ya bidhaa hii hapa china? (ii) Je kuna haki au uhalali wowote wa kuchakachua nembo ya taifa kwa maslahi binafsi aidha kwa mtu mmoja mmoja ndani na nje ya Tanzania? (iii) Je inapotokea hali hii ima kwa muhusika kutoka Tanzania au nje ya Tanzania, ni hatua gani zinatakiwa kuchukuliwa?
Kwa hakika najua habari hii yaweza kuwa na mitazamo mingi na mawazo mnyumbuko, ila swali la msingi je hii ni heshima kwa Taifa letu? Napenda kugawana picha za bidhaa hii ya DongDa Wine ili watanzania wajionee wenyewe tunavyochakachuliwa.
Nipo tayari kutoa ushirikiano zaidi wa habari hii kwa maswali yatakayojitokeza
Patriotspy.